Alergjitë sezonale janë në rritje vitet e fundit dhe po prekin një numër gjithnjë e më të madh qytetarësh.
Rreth 30% e rasteve të vizitave ambulatore lidhen me alergjitë sezonale, duke treguar një shtim të dukshëm krahasuar me vitet e mëparshme. Grupmoshat më të prekura janë të rinjtë dhe të rriturit aktivë, por nuk përjashtohen as fëmijët dhe të moshuarit.
Mjeket theksojnë se alergjia nuk duhet neglizhuar. Nëse nuk trajtohen në kohë, alergjitë e rrugëve të sipërme mund të komplikohen dhe të çojnë në probleme më serioze si sinuziti kronik apo përfshirja e rrugëve të poshtme të frymëmarrjes, duke kaluar në forma më të rënda si astma alergjike.
