UEFA ka vendosur të ndëshkojë Federatën e Futbollit të Kosovës me një gjobë totale prej 35 mijë eurosh. Ky vendim është marrë si rezultat i sjelljeve të evidentuara në ndeshjen kundër Austrisë në transfertë, të zhvilluar më 27 shtator, ku sipas UEFA-s, “dardanët” kanë shfaqur një mesazh të papërshtatshëm dhe janë vërejtur akte të sjelljes raciste.
Për Kosovën, UEFA ka caktuar edhe një masë ndaluese për tifozët në një ndeshje si klub mysafir. Megjithatë, kjo masë është pezulluar për një afat prove prej dy vitesh.
Ndeshja në fjalë: Austria – Kosova (3-1), e luajtur më 27.09.2026 në kuadër të Ligës së Kombeve.
Akuzat e UEFA-s ndaj Federatës së Futbollit të Kosovës
- Shfaqja e një mesazhi të papërshtatshëm për një aktivitet sportiv (banderolë), në përputhje me nenin 16(2)(e) të Rregullores Disiplinore.
- Sjellje raciste dhe/ose diskriminuese, bazuar në nenin 14(2) të Rregullores Disiplinore.
Si pasojë e këtyre shkeljeve, Federata e Futbollit të Kosovës është dënuar me 15 000 euro për shfaqjen e mesazhit të papërshtatshëm gjatë aktivitetit sportiv.
Për më tepër, FFK është ndëshkuar me 20 000 euro të tjera dhe i është ndaluar shitja e biletave për tifozët në një ndeshje të vetme në transfertë në kuadër të një kompeticioni të UEFA-s për ekipet kombëtare, për shkaqe të sjelljes raciste dhe/ose diskriminuese të tifozëve të saj.
Megjithatë, ndalimi për shitjen e biletave ndaj tifozëve të Kosovës për një ndeshje në transfertë mbetet i pezulluar për një periudhë prove prej dy vitesh, duke filluar nga data e këtij vendimi.
