Një incident në lagjen Marble Hill të Nju-Jorkut ku agjentët federalë të emigracionit qëlluan dhe plagosën një burrë brenda automjetit të tij – me një fëmijë të pranishëm – ka ngritur shqetësime të reja lidhur me operacionet e zbatimit të ligjit nën administratën e Presidentit republikan Donald Trump. Sipas kryetarit të bashkisë së qytetit, Policisë së Nju-Jorkut dhe dëshmitarëve, ngjarja ndodhi të enjten.
Të dhënat tregojnë se me rikthimin e Trumpit në detyrë, agjentët e imigracionit në Shtetet e Bashkuara kanë qëlluar të paktën 21 persona, shtatë prej të cilëve kanë humbur jetën, duke nxitur reagime dhe protesta në shumë qytete të vendit.
Kundërshtarë të administratës pretendojnë se shtimi i dëbimeve të urdhëruara nga Trump ka rezultuar në rritje të ndërhyrjeve të dhunshme dhe vënë në dukje mungesën e transparencës për vendosjen e përgjegjësisë ndaj agjentëve të përfshirë në këto incidente.
Presidenti Trump ka shprehur vazhdimisht qëndrimin se një numër i madh emigrantësh duhet të dëbohen nga vendi dhe i ka cilësuar shpesh si përgjegjës për mashtrime financiare dhe krime të dhunshme.
“Raportet fillestare tregojnë se agjentët rrethuan (burrin) dhe një fëmijë 5-vjeçar në makinën e tij, përpara se të qëllonin disa herë,” tha në një deklaratë Zohran Mamdani, anëtar i Këshillit Bashkiak të Nju-Jorkut.
Gjatë një konference të mbajtur në mbrëmje, Mamdani rrëfeu: “Kam folur në telefon me Presidentin Trump dhe Sekretarin (e Sigurisë së Brendshme) Mullin, duke negociuar lirimin e burrit që u qëllua nga agjentët e ICE-s. Ato negociata nuk patën sukses.” Ai theksoi se kishte kërkuar ndërprerjen e operacioneve të zbatimit të ligjit të ICE në qytetin e Nju-Jorkut.
“Këto veprime po e bëjnë qytetin më pak të sigurt,” tha Mamdani.
Ai shtoi më tej: “Ky qytet e do ICE-n jashtë. Ne duam që ICE të largohet nga qyteti ynë, nga shkollat tona, nga spitalet tona, nga rrugët tona dhe të qëndrojë larg fëmijëve tanë.”
Kryetari i bashkisë bëri të ditur se fëmija në automjet nuk ka marrë lëndime fizike. Komisionerja e Policisë së Nju-Jorkut, Jessica Tisch, informoi se pas një kontrolli, fëmija iu dorëzua një të afërmi dhe është nën kujdesin e tij.
Sipas Departamentit të Sigurisë Kombëtare (DHS), që ka në varësi Agjencinë Federale të Emigracionit (ICE), oficerët ishin duke realizuar një “operacion të synuar zbatimi të ligjit” në Bronx të Nju-Jorkut, me qëllim arrestimin e një shtetasi nga Republika Dominikane me një dënim të mëparshëm penal.
Personi, që është identifikuar si 28 vjeç, ka qenë i arrestuar dy herë më parë në qytetin e Nju-Jorkut, në vitet 2023 dhe 2025, sipas komisioneres Tisch.
“Gjatë incidentit, një oficer i ICE-s qëlloi me armë dhe imigranti i paligjshëm me precedentë penalë mbeti i plagosur,” tha DHS, duke theksuar se agjentët ofruan ndihmë të shpejtë.
“Individi është gjallë dhe ndodhet në një spital lokal.”
