Gjykata e Posaçme e Apelit ka përfunduar se kryetari i Partisë Mundësia, Agron Shehaj, është i pafajshëm edhe për akuzën e fyerjes, pas padisë së ngritur nga Adriatik Lapaj, kreu i “Shqipëria Bëhet”.

Me një vendim të datës 1 tetor, Apeli ka rrëzuar pjesërisht vendimin e Gjykatës së Posaçme të Shkallës së Parë, duke hequr dënimin me 300 mijë lekë gjobë që ishte vendosur ndaj Shehajt për këtë vepër penale.

Gjithashtu, vendimi i pafajësisë për akuzën e shpifjes është konfirmuar nga Gjykata e Apelit.

“1. Lënien në fuqi të vendimit nr. 4, datë 21.01.2026 të Gjykatës së Posaçme të Shkallës së Parë për Korrupsionin dhe Krimin e Organizuar, për sa ka disponuar për deklarimin e pafajshëm të të akuzuarit Agron Shehaj, në lidhje me kryerjen e veprës penale të “Shpifjes”, parashikuar nga neni 120/2 i Kodit Penal.

2. Ndryshimin e vendimit nr. 4, datë 21.01.2026 të Gjykatës së Posaçme të Shkallës së Parë për Korrupsionin dhe Krimin e Organizuar si më poshtë vijon:

Në bazë të nenit 388, pika 1, shkronja “c” të K.Pr.Penale, deklarimin e pafajshëm të të akuzuarit Agron Shehaj për kryerjen e veprës penale të “Fyerjes”, parashikuar nga neni 119/2 i Kodit Penal.

3. Shpenzimet procedurale i ngarkohen viktimës akuzuese”, thuhet në njoftimin e Gjykatës së Apelit.