Në Fakultetin Ekonomik të Universitetit të Shkodrës “Luigj Gurakuqi” u zhvillua një ceremoni përkujtimore në nderim të Dr. Albana Kastrati Kullollit, pedagoge dhe kërkuese shkencore, e cila ndër vite dha kontribut në mësimdhënie, kërkimin shkencor dhe formimin e studentëve.
Në ceremoni morën pjesë familjarë, kolegë, studentë dhe qytetarë, të cilët kujtuan figurën dhe veprimtarinë e saj akademike, duke vlerësuar përkushtimin dhe profesionalizmin e treguar gjatë viteve të punës në Universitetin e Shkodrës.
Në shenjë mirënjohjeje, Rektorja e Universitetit të Shkodrës “Luigj Gurakuqi”, Prof. Dr. Blerta Dragusha, i dorëzoi familjes së Dr. Albana Kastrati Kullollit certifikatën e mirënjohjes, të miratuar nga Senati Akademik me vendimin nr. 260, datë 21.09.2026.
Në vlerësimin institucional theksohet kontributi i saj në mësimdhënie dhe formimin e brezave të studentëve, angazhimi në kërkimin shkencor, si dhe puna për promovimin dhe forcimin e emrit të Fakultetit Ekonomik të Universitetit të Shkodrës.
Gjatë ceremonisë u sollën në vëmendje edhe marrëdhëniet njerëzore që Dr. Albana Kastrati Kullolli ndërtoi me studentët dhe kolegët, krahas kontributit të saj profesional.
Ceremonia shërbeu si një moment mirënjohjeje dhe kujtese për një prej figurave të jetës akademike të Universitetit të Shkodrës, ndërsa kontributi i saj mbetet pjesë e kujtesës së institucionit dhe brezave të studentëve që ajo ka formuar.
