Një ngjarje e rëndë sigurie ndodhi në bordin e fluturimit FZ1073 të Flydubai, i cili po udhëtonte nga Dubai drejt Tel Avivit.
Kryeministri i Izraelit, Benjamin Netanyahu, deklaroi se bashkëpiloti kishte sulmuar pilotin me thikë dhe më pas kishte tentuar të rrëzonte avionin duke ndërhyrë në sistemet e tij. Sipas Netanyahut, pasagjerët së bashku me një anëtar të ekuipazhit arritën të hyjnë në kabinën e pilotëve dhe ta neutralizonin autorin e sulmit.
Pas këtij incidenti, pilotë të tjerë në bord morën frenat e situatës dhe arritën të ulin avionin në mënyrë të sigurt në Arabinë Saudite. Fluturimi u devijua drejt aeroportit të Tabukut, ku të gjithë pasagjerët zbritën pa pasoja për jetën e tyre. Sipas agjencisë Reuters, të gjithë udhëtarët rezultuan të sigurt.
Në deklaratën e shpërndarë nga zyra e tij, Netanyahu e quajti ngjarjen “një incident shumë të rëndë sigurie” dhe shtoi se “të gjithë pasagjerët ishin jashtë rrezikut”.
Kryeministri izraelit theksoi se pjesa më e madhe e pasagjerëve në bord ishin izraelitë. Ai tha gjithashtu se kishte biseduar me një prej udhëtarëve, i cili i përshkroi momentin kur avioni pësoi një rrotullim të papritur dhe filloi të humbiste lartësi.
Sipas dëshmisë së dhënë për Netanyahun, pasagjerët dhe një anëtar i ekuipazhit depërtuan me forcë në kabinë dhe e panë bashkëpilotit duke manipuluar sistemet e avionit.
Një zyrtar izraelit bëri të ditur se bashkëpiloti i dyshuar është shtetas i Omanit. Pasi avioni u ul në tokën saudite, ai u ndalua dhe pritet të merret në pyetje nga autoritetet e Arabisë Saudite në lidhje me ngjarjen.
Zyrtarë izraelitë anonimë bënë të ditur se vlerësimi fillestar i autoriteteve të tyre është që ngjarja mund të përbëjë një përpjekje për “sulm terrorist”. Ky vlerësim është ende pjesë e procesit të hetimeve dhe nuk është prezantuar si përfundim përfundimtar.
Gjatë fluturimit, janë transmetuar sinjale emergjence. Sipas të dhënave të gjurmimit të avionit, është regjistruar një humbje e papritur dhe e madhe e lartësisë përpara devijimit drejt Arabisë Saudite. Reuters raportoi se avioni ishte futur në një situatë të rrezikshme para se të ndërhynin pasagjerët dhe ekuipazhi.
Burime të tjera, të referuara nga të dhënat e Flightradar24, shënojnë se avioni ra rreth 14 mijë këmbë lartësi brenda më pak se 30 sekondave.
Në të njëjtën kohë, kompania Flydubai konfirmoi se fluturimi FZ1073 “pati një incident gjatë rrugës” dhe siguroi se të gjithë pasagjerët ishin të sigurt dhe të evidentuar.
Hetimet për të sqaruar të gjitha rrethanat e incidentit janë duke vazhduar.
