Presidenti Donald Trump shprehu të shtunën besimin se Shtetet e Bashkuara dhe Kuba do të hartojnë një marrëveshje, duke theksuar se ai nuk e sheh të nevojshme përdorimin e forcës ushtarake.
“Do të thoja se Kuba dhe ne do të bëjmë një marrëveshje. Nuk mendoj se do të na duhet ushtria”, deklaroi Trump përpara gazetarëve në Shtëpinë e Bardhë.
Qeveria e Trump-it është shprehur qartë se synimi i saj është ndryshimi i regjimit në Kubë. Një embargo ndaj naftës, e vendosur nga SHBA-të në fillim të këtij viti, ka ushtruar presion të madh ndaj Kubës, duke shkaktuar mungesa të theksuara të karburantit dhe ndërprerje të shpeshta të energjisë elektrike, të përkeqësuara nga infrastruktura problematike e vendit.
“Ne duam ta ndihmojmë Kubën. Ne duam ta hapim Kubën për popullin tonë”, tha Trump, teksa përgatitej të udhëtonte për në Tenesi.
Gjatë një fjalimi para Asamblesë së Përgjithshme të OKB-së, të mbajtur të martën, Trump e cilësoi Kubën si një “shtet të dështuar” dhe deklaroi se “liria do të vijë” për vendin ishullor. Gjatë këtij fjalimi, delegacioni kubanez u largua nga salla.
Më vonë të shtunën, ministri i Jashtëm i Kubës, Bruno Rodriguez, foli në OKB duke theksuar se Kuba mbetet e gatshme për dialog me Shtetet e Bashkuara. Ai nuk komentoi drejtpërdrejt deklaratat e Trump.
“Ne jemi të hapur për marrëdhënie tregtare dhe biznesi me kompanitë amerikane, ashtu siç jemi me çdo vend tjetër”, tha Rodriguez, duke dënuar njëherazi embargon tregtare të SHBA-ve ndaj Kubës.
Embargoja e SHBA-ve ndaj Kubës është mbajtur për më shumë se gjashtë dekada, dhe administrata Trump ka forcuar presionin pas ndërhyrjes ushtarake të janarit, të cilën synonte rrëzimin e presidentit venezuelian Nicolas Maduro.
