Autoritetet italiane kanë ndaluar Alok Mittra, 47 vjeç, i cili ishte në kërkim nga organet e drejtësisë shqiptare dhe për të cilin pritet tashmë ekstradimi në Shqipëri. Gjykata e Posaçme e dënoi Mittra-n në vitin 2024 me 15 vjet burg.
Mittra është shpallur fajtor për kryerjen e disa veprave penale, përfshirë “Ndihma për kalim të paligjshëm të kufijve”, “Falsifikimi i dokumenteve”, “Grupi i strukturuar kriminal”, si dhe “Kryerja e veprave penale nga organizata kriminale dhe grupi i strukturuar kriminal”.
Hetimet kanë zbuluar se 47-vjeçari bënte pjesë në një organizatë kriminale që, gjatë rreth gjashtë muajve në periudhën 2023-2024, u përfshi në kalimin e paligjshëm të afro 253 shtetasve nga Bangladeshi drejt vendeve të Bashkimit Evropian.
Sipas të dhënave të policisë, shtetasit nga Bangladeshi transportoheshin fillimisht në Shqipëri nga Dubai. Ata pajiseshin me leje qëndrimi shqiptare, të lëshuara nëpërmjet kontratave të rreme pune, të cilat më pas përdoreshin për të vijuar lëvizjen drejt destinacioneve në BE.
Mittra dyshohet se ka marrë pjesë në organizimin, shoqërimin, transportimin dhe akomodimin e këtyre shtetasve të huaj gjatë lëvizjes së tyre.
Kapja e 47-vjeçarit në Itali i hap rrugën nisjes së procedurave për ekstradimin e tij në Shqipëri, ku e pret vuajtja e dënimit të caktuar nga Gjykata e Posaçme.
