Një denoncim i aktivistit Mirsad Basha ngre alarmin për një situatë tepër serioze në Shkodër, ku materiale me amianti janë shembur me mjete të rënda mekanike, në një zonë të banuar dhe pranë një shkolle.
Nga fotot dhe pamjet e publikuara nga Basha, evidentohet prania e materialeve me amianti, ndërsa shembja është kryer me skavator, duke i thyer dhe copëtuar ato në vend.
Dhe kjo nuk ka ndodhur në një zonë të izoluar.
Shembja është kryer në oborrin e një shkolle dhe mes banesave, duke ngritur pikëpyetje të forta mbi mënyrën se si Bashkia e Shkodrës ka lejuar dhe menaxhuar një ndërhyrje të tillë.
Amianti nuk është një material i zakonshëm ndërtimi. Ai është klasifikuar si kancerogjen për njerëzit dhe, kur dëmtohet apo copëtohet, mund të çlirojë fibra mikroskopike në ajër. Ekspozimi ndaj tyre lidhet me sëmundje të rënda të mushkërive, përfshirë kancerin e mushkërive dhe mezoteliomën.
Megjithatë, në Shkodër, materialet që dyshohet se përmbajnë amianti janë trajtuar sikur të ishin thjesht mbetje të zakonshme ndërtimore.
Skavatori futet mes materialeve me amianti, i copëton dhe i rrëzon në mes të një zone të banuar. Një pamje që ngre pikëpyetje serioze mbi masat e sigurisë të marra gjatë punimeve.
Përgjegjësia institucionale nuk mund të shmanget.
Bashkia e Shkodrës, nën drejtimin e Benet Becit, duhet të japë llogari për mënyrën se si është realizuar kjo ndërhyrje dhe nëse janë respektuar procedurat e detyrueshme për trajtimin e materialeve me amiant.
Nuk bëhet fjalë për një problem estetik, as për një debat politik mbi mënyrën e shembjes së një godine.
Bëhet fjalë për një material kancerogjen, i cili është copëtuar me mjete mekanike në një hapësirë ku ndodhen banesa dhe një shkollë.
Edhe fakti që punimet, sipas denoncimit, janë kryer në një ditë pushimi dhe nxënësit nuk kanë qenë në shkollë, nuk e zhbën problemin. Rreziku potencial nuk zhduket bashkë me largimin e fëmijëve nga ambienti.
Nëse materialet me amianti janë identifikuar përpara ndërhyrjes, atëherë lind një shqetësim edhe më i madh: pse u lejua që ato të shembeshin në këtë mënyrë?
Ndërsa nëse nuk janë identifikuar, pyetja është edhe më serioze: si mund të nisë një shembje pranë një shkolle dhe mes banesave pa u vlerësuar më parë prania e materialeve të rrezikshme?
Shkodra nuk është kantier pa rregulla. Dhe shëndeti i qytetarëve nuk mund të trajtohet si një detaj i parëndësishëm i një projekti bashkiak.
Benet Beci dhe Bashkia e Shkodrës duhet të japin shpjegime publike për këtë ndërhyrje, ndërsa institucionet përgjegjëse duhet të verifikojnë mënyrën e trajtimit të materialit dhe të mbetjeve të krijuara nga shembja.
Amianti nuk është beton që hidhet në kazan. Është material kancerogjen dhe trajtimi i tij kërkon përgjegjësi
