Kryebashkiaku i Lezhës, Pjerin Ndreu, ka ngritur shqetësimin për praninë e shtuar të mushkonjave në zonat e plazhit, duke e konsideruar situatën një problem serioz.
Ai kritikoi mënyrën se si po kryhet dezinfektimi dhe kërkoi më shumë mbështetje për bashkitë.
Sipas tij, qeveria duhet të akordojë grante për bashkitë, në mënyrë që procesi i dezinfektimit të menaxhohet drejtpërdrejt prej tyre.
“Unë nuk e kuptoj se si veprohet me dezinfektimin dhe çfarë hedhin aty. Hedhin, por nuk e di çfarë. Edhe unë vetë kam qenë me gruan në plazh dhe jemi gjendur në një situatë shumë të vështirë nga mushkonjat. Kështu nuk bëhet”, u shpreh Ndreu.
Kryebashkiaku i Lezhës tha se për këtë problem përgjegjësinë e drejtpërdrejtë ia atribuon Ministrisë së Shëndetësisë.
