Prokuroria e Anversës në Belgjikë njoftoi një ditë më parë se ka goditur një bandë shqiptare, e cila trafikonte sasi të mëdha kokaine nga vendet e Amerikës Latine drejt Evropës.
Të paktën katër persona janë arrestuar, mes tyre një ndërmjetës i trafikut mes vendeve të Amerikës Latine dhe Evropës.
Ndërkohë mes të arrestuarve është edhe Gert ‘Gjenerali’, një personazh i njohur i kronikës së zezë në Shqipëri.
Por ajo që bie në sy është se Prokuroria e Anversës njofton se në kuadër të këtij operacioni, Europoli ka sekuestruar edhe një sasi kokaine në Shqipëri.
“Në kuadër të hetimit u bashkëpunua ngushtë me vende të tjera dhe me Europolin. Kjo mund të çojë në arrestime edhe jashtë vendit. Si pasojë e ndërhyrjes, në Shqipëri tashmë është sekuestruar një ngarkesë prej 37 kilogramësh kokainë, e fshehur në një kontejner frigoriferik,” bëri të ditur organi i akuzës në Belgjikë.
Por ndërkohë në Shqipëri nuk ka njoftim zyrtar për këtë çështje. I vetmi njoftim është bërë një ditë më parë për një sasi prej mbi 41 kg kokainë të kapur në Portin e Durrësit. Aty nuk përmendet fare Europoli dhe as banda e goditur në Belgjikë.
Por në njoftimin e policisë shqiptare thuhet se ishin 37 pako me kokainë, e cila ashtu siç thotë prokuroria belge, u gjet në një kontejner frigoriferik që vinte nga Amerika Latine.
A bëhet fjalë për të njëjtën sasi kokaine? Kjo nuk dihet, por ajo që dihet me saktësi është se Porti i Durrësit vlerësohet si një pikë e rëndësishme hyrëse e kokainës nga Amerika Latine, por sekuestrimet kanë qenë thuajse inekzistente.
