Regjistrimet në shkollat profesionale vijojnë edhe pas përfundimit të procesit për klasat e para dhe të dhjeta. Nxënësit që dëshirojnë të ndjekin një profil profesional kanë kohë deri më 30 shtator për të bërë zgjedhjen e tyre.
Specialistët e arsimit profesional në Zyrën Vendore Arsimore i ftojnë të rinjtë të shfrytëzojnë këtë mundësi, duke vlerësuar se arsimi profesional u ofron atyre jo vetëm formim, por edhe mundësinë për të përfituar një profesion konkret.
Sipas Rudi Sokolit, interesi i të rinjve për këto shkolla vijon të jetë i lartë. Profilet e ofruara janë të shumta dhe synojnë t’i përgjigjen kërkesave që ka aktualisht tregu i punës.
Deri më 30 shtator, mundësinë për t’u regjistruar e kanë edhe nxënësit që ende nuk kanë vendosur se cilin drejtim duan të ndjekin. Përmes arsimit profesional, ata mund të marrin njohuri teorike dhe aftësi praktike që mund t’i ndihmojnë në punësimin e tyre pas përfundimit të shkollës.
Synimi është që të rinjtë të përfundojnë arsimin me një profesion të përcaktuar dhe me aftësi praktike të përshtatura me nevojat e tregut të punës.
