Drejtori i Ujësjellësit të Elbasanit, Luan Tabaku, është dhunuar gjatë paradites së të dielës, 6 shtator, në qendër të qytetit.
Sipas të dhënave paraprake, Tabaku është dhunuar nga dy persona, të identifikuar si Endri Çopja dhe Horgito Peqini. Dyshohet se gjatë përplasjes janë përdorur sende të forta, dhe si pasojë e dhunës Luan Tabaku ka pësuar dy fraktura në kokë.
Ai është dërguar në spital për ndihmë mjekësore, por sipas raportimeve në media, pavarësisht hematomave të shkaktuara nga dhuna, ai nuk ka depozituar kallëzim në Policinë e Elbasanit.
Një nga pistat që po shqyrtohet për motivin lidhet me një konflikt të dyshuar për punësimin. Sipas të dhënave paraprake, Tabaku dyshohet se kishte marrë më herët një vendim për largimin nga puna në Bashkinë e Elbasanit të bashkëshortes së Endri Çopjas. Ky vendim po verifikohet nëse ka shërbyer si shkak për përplasjen.
Po ashtu, në hetim po merret në konsideratë edhe historiku i personave që dyshohet se janë përfshirë në konflikt. Deri më tani nuk ka ende një reagim zyrtar nga policia lidhur me sqarimin e plotë të rastit.
