Situata e zjarrit në zonën e Bardhajt dhe Myselimit, në Bashkinë Shkodër, paraqitet më e qetë pas ndërhyrjes së koordinuar nga toka dhe ajri.
Sipas Prefektes së Qarkut Shkodër, Holta Duda, ndërhyrja nga ajri me helikopter të Forcave të Armatosura, e kombinuar me veprimet nga toka të efektivëve të MZSH Shkodër dhe forcave operacionale vendore, ka bërë të mundur uljen e ndjeshme të intensitetit të flakëve.
Aktualisht, rreziku për banesat është evituar dhe nuk ka kërcënim të drejtpërdrejtë për zonat e banuara.
Zjarri vijon të jetë aktiv në një sipërfaqe me pyll pishe dhe bimësi të ulët, ndërsa ekipet në terren po punojnë për izolimin dhe shuarjen përfundimtare të vatrës.
