Nata e shtatë e “Koko Fest” solli në Teatrin “Andon Zako Çajupi” trupën teatrore “Migjeni” nga Shkodra, e cila prezantoi komedinë e zezë “Gomerët e trojeve”. Nën drejtimin dhe autorësinë e Gent Bejkos, kjo shfaqje shpalosi një ndërthurje mes antikitetit dhe realitetit të sotëm duke përdorur humor, ironi dhe satirë për të vënë në pah plagët sociale e politike në Shqipëri.
“Për mua është disata herë që kam luajtur në këtë teatër të mrekullueshëm, është disata herë që vij, dhe sinqerisht ta them: të vish në Korçë, sidomos në anën time personale si Jozef, por edhe si shkodran, është një ndjenjë e veçantë. Dashuria jonë ndaj këtij qyteti është gjithmonë shumë e madhe, sepse Korça është kaq artdashëse dhe kaq punëtore për artin.” – u shpreh aktori Jozef Shiroka.
“Mesazhet e shfaqjes, ashtu siç kanë qenë në antikitet, nuk kanë ndryshuar asgjë. Edhe në ditët e sotme janë të njëjtat problematika, është i njëjti mentalitet. Luftrat janë po të njëjta, marrëdhënia e njerëzve është po e njëjtë: intriga, dhunë, vjedhje, korrupsion, çdo gjë. Thjesht ndryshon koha dhe gjeografia, por gjithçka mbetet e njëjtë. Kështu që antikiteti i ardhur në kohët e sotme nëpërmjet kësaj shfaqjeje është një mesazh që i tregon shoqërisë se ne, si shoqëri, së pari duhet të ndryshojmë.” – theksoi aktori Nikolin Ferketa.
Vepra shfrytëzoi situata komike dhe një gjuhë të mprehtë satirike për të krahasuar të shkuarën me realitetin aktual, duke nxitur audiencën të reflektojë mbi sfidat që ende përballet shoqëria shqiptare. Shfaqja shkodrane u mirëprit nga spektatorët e Korçës, teksa festivali vijon të sjellë në skenë trupa teatrore nga të gjitha trevat shqipfolëse.
