Pas një pritjeje të shkurtër, përgjigjja që pritej mbërriti dhe njëherë tjetër thekson hendekun e thellë që ndan dy organizatat më të fuqishme të futbollit global.
FIFA akuzon UEFA-n se ka ndërmarrë një “fushatë shpifjesh” kundër saj, duke i cilësuar kërkesat ligjore të unionit europian për të marrë akses në dokumentacionin që lidhet me një projekt të diskutueshëm për investime private si pjesë të kësaj fushate.
UEFA i është drejtuar gjykatave në Shtetet e Bashkuara për të marrë dëshmi dhe dokumente rreth “FIFA Forward Enterprise”, një kompani private e planifikuar për të menaxhuar organizimin e Kupës së Botës dhe eventeve të tjera madhore të futbollit.
Më parë, muajin e kaluar, FIFA pranoi publikisht se plani përfshinte shitjen e 20 për qind të kompanisë te investitorë privatë. Ky projekt u tërhoq nga presidenti Gianni Infantino më 1 gusht, pasi hasi rezistencë nga UEFA, Konfederata Aziatike e Futbollit, si dhe konfederata që mbulon Amerikën e Veriut, Qendrore dhe Karaibet.
Pavarësisht anulimit të planit, UEFA nuk e ka ndalur presionin ndaj Infantinos dhe zyrtarëve të tjerë të FIFA-s. Dokumentet që kërkohen do të shërbenin në përgatitjen e mundshme të procedurave penale kundër kreut të FIFA-s dhe bashkëpunëtorëve të tij të afërt.
FIFA ka kërkuar në Gjykatën e Distriktit Jugor të Floridës të drejtën për të kundërshtuar kërkesën e UEFA-s, një kërkesë që është pranuar nga gjykata. FIFA-së i është dhënë afati deri më 28 shtator për të paraqitur një kundërshtim të plotë në këtë gjykatë.
Një kërkesë e ngjashme për kundërshtim është dorëzuar të martën në Gjykatën e Distriktit Jugor të Nju Jorkut. Sipas dokumenteve të paraqitura nga përfaqësuesit ligjorë të FIFA-s, “pak më shumë sesa thjesht deklarata për shtyp në mbështetje të mëtejshme të fushatës së shpifjeve të UEFA-s kundër FIFA-s dhe udhëheqjes së saj”.
