Një dron rus Shahed ka sulmuar ndërtesën e Shërbimit të Sigurisë së Ukrainës (SBU) në Kiev, në një incident që autoritetet ukrainase e kanë përshkruar si veçanërisht të rëndë për shkak të shënjestrimit të objektivit.
Presidenti i Ukrainës, Volodymyr Zelensky, deklaroi se droni ishte programuar të godiste drejtpërdrejt zyrën e shefit të SBU-së, Oleksandr Poklad, duke e cilësuar këtë akt si një tentativë për atentat ndaj kreut të shërbimit të inteligjencës së Ukrainës.
“Droni ishte drejtuar drejtpërdrejt në zyrën e kreut të SBU-së në këtë ndërtesë”, theksoi ai.
Zelensky njoftoi se i ka kërkuar Pokladit të përgatisë një kundërpërgjigje ndaj Rusisë, të cilën ai kërkoi që të jetë “adekuate, e ndjeshme dhe, nëse është e mundur, simetrike”.
“Ushtria jonë do ta mbështesë këtë përgjigje”, shtoi presidenti ukrainas, duke mos zbuluar detaje mbi mënyrën sesi do të realizohet kundërpërgjigjja.
Dronët Shahed janë shndërruar në një element kyç të strategjisë ajrore të Rusisë kundër Ukrainës, ndërkohë që Kievi ka theksuar vazhdimisht gatishmërinë për të reaguar ndaj këtyre sulmeve përmes objektivash ushtarakë dhe të sigurisë brenda Rusisë.
