Policia e Shtetit ka bërë publike detaje të reja rreth arrestimit të Nexhmedin Danajt në Dubai.
“Finalizohet, në bashkëpunim me homologët në Emiratet e Bashkuara Arabe, një tjetër fazë e operacionit ndërkombëtar të koduar “The Wanted”.
Gjatë kësaj faze të operacionit ndërkombëtar “The Wanted”, falë bashkëpunimit të ngushtë mes specialistëve të Drejtorisë së Interpolit dhe përfaqësuesve të Interpol Abu Dhabit, është realizuar arrestimi i përkohshëm i shtetasit N. D., 57 vjeç, me synimin e ekstradimit të tij në Shqipëri.
Ky person ishte në kërkim ndërkombëtar, pasi Gjykata e Posaçme e Shkallës së Parë për Korrupsionin dhe Krimin e Organizuar kishte vendosur në prill të vitit 2026 masën e sigurisë “Arrest në burg” ndaj tij, për akuzat “Trafikimi i narkotikëve”, “Pastrimi i produkteve të veprës penale ose veprimtarisë kriminale”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Hetimet kanë nxjerrë dyshime se 57-vjeçari ka pasur rol të rëndësishëm në një grup të strukturuar kriminal, duke financuar, organizuar dhe mundësuar trafikimin e substancave narkotike nga Amerika Latine drejt vendeve të Bashkimit Evropian.
Po ashtu, N. D. akuzohet për përdorimin e metodave të avancuara financiare, përfshirë transfertat digjitale, për të realizuar pagesa të mëdha në disa shtete, me qëllim blerjen e lëndëve narkotike.
“Vijon bashkëpunimi ndërmjet Interpol Tiranës dhe Interpol Abu Dhabit për finalizimin e procedurave për ekstradimin e 57-vjeçarit në Shqipëri”, njoftojnë blutë.
