Pllanë, Lezhë – Një situatë shqetësuese mjedisore është denoncuar pranë brigjeve të lumit Mat, në afërsi të fshatit Pllanë.
Sipas Gjin Gjonit, automjete të ndryshme, mes tyre kamionçina dhe fugonë, hedhin mbetje në këtë zonë, duke krijuar një vendgrumbullim informal dhe të paligjshëm.
Gjoni e konsideron situatën një “masakër mjedisore” dhe e lidh atë me mungesën e menaxhimit të mbetjeve nga Bashkia Lezhë.
Ai kërkon që institucionet të verifikojnë situatën në terren dhe të marrin masa, duke ngritur edhe shqetësimin se heqja e koshave të mbeturinave nuk mund të shoqërohet me kërkesën ndaj qytetarëve për të mos i depozituar mbetjet në hapësira publike, pa u ofruar alternativa.
Sipas denoncimit, problemi nuk është i izoluar vetëm në Pllanë, por shfaqet edhe në zona të tjera të Lezhës.
Brigjet e lumit Mat janë një zonë me rëndësi të veçantë mjedisore dhe turistike. Pyetja mbetet: kush po e kontrollon dhe kush mban përgjegjësi për këtë situatë?
Burimi: Zani i Veriut
