Vllaznia nuk ka shkuar më shumë se barazimi 1-1 në transfertën ndaj Elbasanit, në një ndeshje që është shoqëruar me debate të forta për vendimet e arbitrimit.
Skuadra shkodrane pretendon se i janë mohuar dy gola në pjesën e dytë, vendime që sipas klubit kanë ndikuar drejtpërdrejt në rezultatin përfundimtar të takimit.
Rasti i parë lidhet me Tafilin, i cili goditi nga rreth 25 metra dhe e dërgoi topin në rrjetë. Goli megjithatë u anulua nga kryesori Dorian Maletaj, duke shkaktuar protesta nga kampi kuqeblu.
Vllaznia pati sërish mundësinë të kalonte në avantazh në fundin e takimit, kur Musta realizoi, por edhe ky gol nuk u konsiderua i vlefshëm nga arbitri.
Dy vendimet kanë shkaktuar pakënaqësi të mëdha te shkodranët, të cilët e konsiderojnë gjykimin vendimtar në humbjen e dy pikëve.
Në kampin kuqeblu kërkohet që performanca e arbitrit Dorian Maletaj të analizohet nga strukturat përkatëse të FSHF-së dhe të merren masa për vendimet e marra gjatë kësaj sfide.
Në fund, Vllaznia largohet nga Elbasani me një pikë, ndërsa dy golat e anuluar do të mbeten në qendër të diskutimeve pas ndeshjes.
