Një incident mes katër personash u shënua mbrëmjen e sotme në lagjen 8 të qytetit të Korçës, në zonën e njohur si Radaneci.
Informacionet paraprake tregojnë se dy vëllezër u përfshinë në një grindje me dy fqinjët e tyre për arsye të parëndësishme. Debati nisi për shkak të lojës së fëmijëve në lagje, por më pas konflikti mori përmasa fizike.
Si rezultat, dy vëllezërit pësuan dëmtime të lehta në kokë. Ata u dërguan në spital dhe morën trajtimin e nevojshëm mjekësor.
Pas trajtimit në spital, të katër personat u shoqëruan në komisariat për deklarime. Shkak i përplasjes është bërë zhurma e krijuar nga fëmijët që luanin pranë banesave. Ekziston dyshimi se gjatë sherrit mund të jenë përdorur mjete të forta si drurë, por për fat të mirë ngjarja nuk pati pasoja të rënda.
Aktualisht, grupi hetimor ka nisur hetimet për të sqaruar plotësisht rrethanat e incidentit. Pritet të konfirmohet nëse gjatë përleshjes janë përdorur sende të forta.
