Vllaznia do të kërkojë të lërë pas barazimin 2-2 ndaj Skënderbeut dhe të rikthehet te rezultatet pozitive në transfertën e Elbasanit.
Në prag të sfidës, trajneri Edi Martini pranon se skuadra shkodrane ende nuk është në nivelin e lojës që ai kërkon. Sipas teknikut kuqeblu, ka elementë që duhen korrigjuar, por në këtë fazë të kampionatit rëndësi të veçantë kanë pikët dhe rezultatet.
Martini e konsideron të vështirë përballjen me Elbasanin, megjithatë objektivi i Vllaznisë është i qartë, të bëjë një ndeshje të fortë dhe të marrë maksimumin e mundshëm.
Trajneri shkodran është ndalur edhe te lëvizjet në organikën e ekipit. Ai ka folur për largimin e Kobiljar, i cili u largua pas firmosjes me klubin, si dhe për mbrojtësin Gjini, që tashmë është pjesë e Elbasanit, pasi më herët shkoi tek ekipi i tij Ballkani nga ku kishte ardhur si huazim.
Pas hapit fals në start, Vllaznia kërkon që transferta e radhës të shërbejë si mundësi për të dhënë një sinjal tjetër dhe për të marrë pikët e para të plota të sezonit.
