Panik dhe përplasje u regjistruan në një dasmë në Westlake, Ohio, pasi një konflikt familjar la të ftuarit të tmerruar dhe të detyruar të braktisnin festën. Përleshja, e cila shpërtheu papritur, i bëri shumë dasmorë të nxitojnë drejt parkingut, ndërsa situata brenda sallës doli jashtë kontrollit. Një i pranishëm tregoi për policinë se po kërcente kur “katër vëllezër” e sulmuan, duke shënuar fillimin e një skene të dhunshme që përfshiu gjithë ambientin.
Forcat e rendit të Westlake bënë të ditur se Raed Mahmoud Suleiman, 46 vjeç, dyshohet se ka marrë një thikë gjalpi nga një prej tavolinave dhe ka kërcënuar të ftuarit e tjerë. Sipas pamjeve të siguruara, tensioni arriti kulmin kur dikush nga të pranishmit hodhi një karrige drejt burrit që mbante thikën. Shefi i Policisë së Westlake, Jerry Vogel, deklaroi: “Ai e çoi një hap më tej dhe nxori një thikë të vërtetë gjalpi, me sa duket nga një shërbim darke, dhe po kërcënonte njerëzit me të”.
Pasi policia mbërriti në vendngjarje, afro 40 pjesëmarrës ishin tashmë jashtë në parking, përpjekur të shmangnin përshkallëzimin e mëtejshëm të situatës. Sipas hetimeve paraprake, shkaku i sherrit mendohet të ketë qenë një mosmarrëveshje e hershme mes dy familjeve, të cilat për shkak të rastit u ndodhën bashkë për herë të rrallë. Prania e tyre në të njëjtin ambient solli në sipërfaqe tensionet e së kaluarës, të cilat u materializuan në konflikt fizik.
“Kur u takuan, gjithçka doli përsëri në sipërfaqe”, tha Vogel. Raed Mahmoud Suleiman u vendos në pranga, ndërsa ndaj tij rëndojnë akuza për sulm, nxitje paniku dhe fshehje provash. Policia dyshon se ai ka hedhur thikën para ardhjes së efektivëve. Përveç Suleiman, janë arrestuar edhe dy persona të tjerë në lidhje me ngjarjen. Hetimet vazhdojnë për të zbardhur të gjitha rrethanat dhe për të sqaruar rolin që ka pasur secili i përfshirë në incident.
