Ish-efektivi i Policisë së Shtetit, Uljan Shpataraku, është transferuar në burgun e Peqinit, pas vendimit të Gjykatës së Posaçme për ta lënë në masën e sigurisë “arrest me burg”.
Shpataraku u arrestua më 26 gusht në zonën e Plepave në Durrës, në të njëjtin automjet me biznesmenin Ergys Agasi, i cili ishte shpallur në kërkim nga SPAK prej rreth tetë muajsh.
Në momentin e ndërhyrjes së forcave të Policisë, Shpataraku ishte drejtuesi i automjetit, ndërsa Agasi ndodhej në sediljen e pasagjerit.
Sipas SPAK, Shpataraku u arrestua në flagrancë për veprën penale të “përkrahjes së autorit të krimit”.
Më 29 gusht, GJKKO vendosi që Shpataraku të qëndrojë në burg. Ish-zyrtari i Policisë dhe mik i ish Drejtorit të Përgjithshëm të Policisë Proda, u la në masën “arrest me burg”, ndërsa ndaj tij vijon procedimi për akuzën e përkrahjes së autorit të krimit.
