Shiroka vijon të jetë një nga destinacionet më të frekuentuara pranë Shkodrës, duke tërhequr jo vetëm banorët vendas, por edhe një numër në rritje turistësh shqiptarë dhe të huaj. Pozicioni buzë Liqenit të Shkodrës, peizazhi natyror, klima dhe kuzhina tradicionale janë ndër arsyet që e bëjnë zonën gjithnjë e më të kërkuar.
Turistët që vizitojnë Shirokën veçojnë kombinimin e veçantë të liqenit me malin, panoramën dhe qetësinë që ofron zona, duke e cilësuar si një destinacion të përshtatshëm për pushim dhe shëtitje.
Megjithatë, krahas vlerësimeve pozitive, një prej problematikave të ngritura nga vizitorët lidhet me pastërtinë. Sipas tyre, një zonë me potencial të madh natyror dhe turistik duhet të ketë më shumë kujdes për mirëmbajtjen e hapësirave publike dhe menaxhimin e mbetjeve.
Me liqenin përballë dhe malin pas, Shiroka ofron një panoramë të veçantë në afërsi të qytetit të Shkodrës. Distanca e shkurtër dhe aksesi i lehtë kanë ndikuar që ajo të mos jetë më vetëm një destinacion veror, por të vizitohet gjatë gjithë vitit.
