Një automjet u dëmtua në orët e para të mëngjesit në zonën e Laknasit, Kamëz, duke shtyrë policinë të nisë menjëherë hetimet për të zbuluar përgjegjësit e incidentit.
Burime paraprake bëjnë me dije se ngjarja ndodhi rreth orës 03:00, kur një 41-vjeçar me inicialet Y. T. informoi Sallën Operative se kishte dëgjuar një zhurmë në rrugën “Lunxheria”. Sipas kallëzimit të tij, pas daljes në oborr, ai vuri re që automjeti i tij ishte dëmtuar lehtë në pasqyrë dhe në derën e shoferit.
Hetimet e para tregojnë se një person ende i paidentifikuar mund të ketë hedhur një sasi të vogël lënde plasëse në drejtim të automjetit, duke shkaktuar dëme materiale të vogla.
Grupi hetimor po bashkëpunon me Prokurorinë për të dokumentuar në detaje rrethanat e ngjarjes dhe për të identifikuar si dhe për të arrestuar autorin ose autorët e përfshirë.
