Policia në Qipro ka nisur hetime për një incident të rëndë neglizhence prindërore, pasi një vajzë 11-vjeçare dyshohet se ka mbetur vetëm në shtëpi për dy ditë pa praninë e asnjë të rrituri.
Të enjten mbrëma, autoritetet morën një njoftim lidhur me rastin dhe shkuan menjëherë në banesën e vajzës. Gjatë kontrollit, oficerët konstatuan se ajo ndodhej krejt e vetme.
Oficerët e policisë e pyetën të miturën për babain, dhe ajo, sipas raportimeve, u tha atyre se ai kishte udhëtuar jashtë vendit për të ndjekur një ndeshje futbolli dhe kishte munguar që prej dy ditësh.
Sipas të dhënave të para të hetimit, babai kishte shkuar në Shqipëri për të parë ndeshjen mes Paphos FC dhe Dynamo City, e cila ishte luajtur në Elbasan në kuadër të fazës kualifikuese të Ligës së Konferencës së UEFA-s.
Paphos FC kishte organizuar një udhëtim zyrtar për tifozët, me nisje nga Paphos më 19 gusht.
Pas ndërhyrjes së policisë, Shërbimet e Mirëqenies Sociale u angazhuan duke marrë në kujdes dhe mbrojtje vajzën 11-vjeçare.
Ndërkohë, ndaj babait janë duke u kryer hetime për dyshime të neglizhencës dhe keqtrajtimit të fëmijës.
Hetimet vazhdojnë, ndërsa ende nuk dihet nëse babai është kthyer në Qipro apo nëse është lëshuar urdhër-arresti ndaj tij.
