Në jug të Libanit, sulme ajrore izraelite kanë marrë jetën e njëmbëdhjetë personave, sipas autoriteteve vendase, duke shënuar një nga episodet më të rënda të dhunës që nga shpallja e një marrëveshjeje që kishte për qëllim uljen e tensioneve në qershor.
Sipas kryeministrit të Libanit, shtatë persona humbën jetën gjatë një sulmi që goditi një banesë në periferi të Ansarit, lagjja Nabatieh. Mediat shtetërore raportuan se mes viktimave ndodheshin tre fëmijë dhe dy gra, raportoi BBC.
Po atë ditë, autoritetet libaneze njoftuan se një valë tjetër goditjesh ajrore u regjistrua në qytetin Deir al-Zahrani. Sipas Ministrisë së Shëndetësisë, nga ky sulm humbën jetën katër persona dhe pesë të tjerë mbetën të plagosur.
Ndërkohë, ushtria izraelite deklaroi se kishte kryer operacione ndaj “infrastrukturës terroriste të Hezbollahut”, në përgjigje të asaj që e përshkroi si një aksion të mëparshëm kundër forcave të veta.
Autoritetet bënë të ditur se sulmi në Ansar u krye rreth orës 04:30 të mëngjesit (01:30 GMT), në një zonë ku ishin strehuar familje të zhvendosura. Pamjet e publikuara në rrjetet sociale shfaqin re të dendura tymi duke u shtrirë nëpër rrugët e fshatit, ndërsa dëgjoheshin sirena alarmi.
Kryeministri libanez, Navaf Salam, e dënoi ashpër këtë akt, duke theksuar se shtatë civilët e vrarë “nuk ishin infrastrukturë ushtarake”.
