Sajmir Halilaj është dënuar me 3 vjet e 6 muaj burg pasi policia gjeti kokainë dhe mijëra paund para në automjetin e tij.
22-vjeçari, banues në Moreton Way, Slough, pranoi fajësinë në Gjykatën e Kurorës në Reading më 11 dhjetor për posedim kokaine me qëllim shpërndarjeje, drejtim mjeti pa leje drejtimi, përdorim të automjetit pa siguracion, posedim të pasurisë me origjinë kriminale dhe posedim të një dokumenti identiteti me qëllim të paligjshëm.
Sipas policisë, automjeti i Halilajt u ndal rreth orës 17:30 të datës 12 qershor, pasi ai nuk kishte leje drejtimi dhe as siguracion. Gjatë kontrollit, ai paraqiti një leje drejtimi sllovake të falsifikuar në përpjekje për t’i shpëtuar arrestimit.
Në kontrollin e mëtejshëm, efektivët gjetën 46 doza kokaine me një vlerë rreth 1,840 paund dhe 3,955 paund para në dorë. Halilaj u arrestua po atë ditë dhe u akuzua zyrtarisht një ditë më vonë.
Oficeri hetues, PC Tom Hughes-Parry, tha se Halilaj po shpërndante drogë të kategorisë A në të gjithë zonën e Slough, duke treguar shpërfillje të plotë ndaj ligjit dhe dëmit që këto substanca shkaktojnë në komunitet.
“Ky dënim pasqyron seriozitetin e veprimeve të tij dhe përcjell një mesazh të qartë se trafikimi i drogës nuk do të tolerohet”, deklaroi ai.
