Autoriteti Rrugor Shqiptar ka bërë me dije se më 14 dhe 15 gusht 2026, në intervalin orar 23:00 deri në 05:00, do të realizohet një devijim i përkohshëm i trafikut në autostradën Tiranë-Durrës. Ky ndryshim vjen për shkak të punimeve për montimin e trarëve metalikë në mbikalimin e ri të Kasharit.
Kjo ndërhyrje është pjesë e punimeve në projektin “Zgjerimi i Superstradës Tiranë-Durrës (Faza III)”.
ARRSH njofton se për të mundësuar vijimin e punimeve dhe për të garantuar sigurinë rrugore, do të ndalohet qarkullimi në dy korsitë kryesore të segmentit Tiranë-Durrës.
Gjatë orëve të ndërhyrjes, trafiku për automjetet që lëvizin drejt Durrësit do të orientohet në dy korsitë e majta të autostradës, të cilat do të shndërrohen përkohësisht në rrugë me dy drejtime qarkullimi.
Ndërkohë, automjetet që kanë si destinacion Aeroportin Ndërkombëtar të Tiranës, do të vijojnë lëvizjen normalisht, sipas njoftimit të ARRSH-së.
Autoriteti Rrugor Shqiptar u kërkon drejtuesve të mjeteve të jenë të kujdesshëm gjatë periudhës së punimeve dhe shpreh mirënjohje për mirëkuptimin e banorëve dhe bizneseve të zonës për këtë ndërhyrje të planifikuar.
