Kliti Hoti ka reaguar për situatën e krijuar në pikat kufitare të Muriqanit dhe Hanit të Hotit, ku gjatë sezonit turistik krijohen radhë të gjata dhe pritje me orë për shkak të fluksit të lartë të udhëtarëve.
Në një reagim të tij, Hoti thekson se mbingarkesa përsëritet çdo vit, duke prekur jo vetëm turistët dhe emigrantët shqiptarë, por edhe qytetarët që i përdorin këto pika kufitare përditë.
Sipas tij, një nga zgjidhjet më të shpejta do të ishte koordinimi me autoritetet malazeze për zbatimin e një protokolli që do të mundësonte një kontroll të vetëm kufitar, duke eliminuar kontrollin e dyfishtë.
Hoti thotë se për këtë çështje i ka dërguar një kërkesë zyrtare Ministrit të Brendshëm, por ende nuk ka marrë përgjigje, ndonëse sezoni turistik është drejt fundit.
“Eliminimi i kontrollit të dyfishtë është hapi më i shpejtë dhe efektiv për të ulur sadopak pritjen e udhëtarëve drejt këtyre pikave”, shprehet Hoti.
Ai ngre shqetësimin se, pavarësisht përsëritjes së kësaj problematike çdo sezon, ende nuk është gjetur një zgjidhje konkrete për të shmangur radhët kilometrike dhe pritjet e gjata në temperaturat e larta.
