Ministria e Mbrojtjes ka publikuar një përditësim të ri lidhur me situatën e zjarreve në gjithë vendin. Sipas të dhënave të fundit, gjatë 11 orëve të fundit janë ende të hapura 10 vatra zjarri.
Në njoftim thuhet se për shuarjen e këtyre zjarreve janë mobilizuar gjithsej 531 forca operacionale dhe 29 mjete. Midis tyre përfshihen 104 zjarrfikës të MZSH-së, 250 trupa të Forcave të Armatosura, 120 punonjës nga bashkitë, ADZM-ja dhe shërbimi pyjor, 20 punonjës të Policisë së Shtetit, 31 vullnetarë dhe 6 përfaqësues nga AKMC dhe Emergjencat Civile.
Përveç trupave nga toka, janë angazhuar dhe 5 helikopterë të Forcës Ajrore si dhe 2 avionë Air Tractor. Në zonën e Dajtit, 22 efektivë të MZSH-së dhe ADZM-së po kryejnë operacione të mbështetura nga 2 helikopterë të Forcës Ajrore; ndërkohë, në Priskë e Madhe janë të angazhuar 15 efektivë me 4 automjete zjarrfikëse dhe dy helikopterë. Në të dyja këto zona, nuk ka rrezik për komunitetet përreth.
Në Drenie të bashkisë Patos, operacioni po vazhdon nga toka me ndërhyrjen e forcave zjarrfikëse dhe 30 ushtarëve të Forcave të Armatosura, të ndihmuar dhe nga një autoambulancë ushtarake.
Aktivitete të shumta janë duke u zhvilluar edhe në Krujë. Në zonën e Abaze, operojnë forcat tokësore së bashku me 57 ushtarë të FA-së dhe 2 helikopterë; aktualisht nuk konstatohet rrezik për zonat e banuara.
Në lagjen Bojë, një vatër po menaxhohet nga toka, ndërsa për një tjetër që ndodhet në terren të vështirë është dërguar një helikopter i FA-së, ndërkohë pranë banesave janë vendosur tre automjete zjarrfikëse. Në Krastë–Halil vijojnë ndërhyrjet pa u evidentuar kërcënime për komunitetin.
Ndërkohë, në Nëmerçkë dhe Dhëmbel, bashkia Përmet, grupet e operacionit po punojnë në zona malore të vështira, por deri tani nuk raportohen rreziqe për banesat.
Një operacion i rëndësishëm vazhdon në Gurë-Lurë, bashkia Dibër, ku janë përfshirë MZSH, Policia e Shtetit, forcat bashkiake, ADZM-ja, shërbimi pyjor, vullnetarë, AKMC, 50 trupa të Forcave të Armatosura dhe 2 avionë Air Tractor. Ekipet operacionale janë vendosur pranë zonave të banuara që mund të rrezikohen nga zjarri.
Gjithashtu, në malin e Moravës, bashkia Devoll, forcat operacionale po punojnë në një zonë të mbrojtur me pyje pishe. Aktualisht, nuk është shfaqur rrezik për banorët e afërt.
AKMC është duke monitoruar pa ndërprerje situatën në të gjithë territorin dhe po bashkëpunon me strukturat qendrore dhe vendore të mbrojtjes civile. Është duke u ndjekur në kohë reale ecuria e vatrave të zjarrit dhe po vlerësohen nevojat për shtim të kapaciteteve tokësore dhe ajrore. Forcat do të vijojnë të mbeten të angazhuara deri në shuarjen e plotë të çdo vatre aktive.
