Pas apelit për ndihmë, qytetarë dhe sipërmarrës janë bërë bashkë për familjen me 7 anëtarë, e cila mbeti pa shtëpi pas zjarrit të fuqishëm që shkrumboi banesën e tyre në Bulevardin “Bujar Bishanaku”.
Mes atyre që kanë zgjedhur të kontribuojnë është edhe Altin Prenga, drejtuesi i “Mrizi i Zanave”, i cili ka dhuruar 600 euro dhe u është bashkuar thirrjeve për më shumë ndihmë.
Por mbështetja nuk po matet vetëm me paratë. Qytetarë të shumtë po ofrojnë edhe punën e tyre për të ndihmuar në rindërtimin e shtëpisë.
Paulin Daija, mjeshtër i punimeve të çative nga Hajmeli, ka marrë përsipër që të gjitha punimet e çatisë t’i kryejë pa pagesë për familjen Kruja.
Familja përbëhet nga Blerim Kruja, bashkëshortja, katër fëmijët dhe nëna e moshuar. Një shkëndijë elektrike të shtunën shkatërroi brenda pak minutash banesën dhe gjithçka që kishin.
Sot, mes dhimbjes së humbjes, familja po merr një tjetër mesazh: nuk është vetëm.
Shkodranët kanë nisur të japin shembullin e tyre. Tashmë sytë janë edhe nga bizneset e qytetit, me shpresën që kjo valë solidariteti të zgjerohet dhe familja Kruja të ketë mundësi të rindërtojë shtëpinë dhe jetën e saj.
