Presidenti i Shteteve të Bashkuara, Donald Trump, deklaroi të dielën se SHBA po zhvillon bisedime me Iranin në një nivel të ulët intensiteti, ndërsa theksoi se presioni ekonomik ndaj këtij shteti do të shtohet.
Gjatë një interviste telefonike për Axios, Trump tha: “Po e bëjmë këtë me zë të ulët”.
Ai shpjegoi se negociatat janë ende në fazat fillestare: “Ne jemi vetëm në gjysmë të negociatave me ta. Po e vëzhgojmë Iranin me inflacionin e tij të madh dhe faktin që ata nuk kanë para”, u shpreh presidenti.
Trump shtoi për Axios se situata ekonomike e Iranit është e vështirë, duke përmendur se autoritetet në Teheran nuk kanë fonde të mjaftueshme për të paguar ushtrinë.
Këto reagime të presidentit vijnë në një kohë kur nga pala iraniane janë shtuar thirrjet për rihapjen e Ngushticës së Hormuzit. Ministri i Jashtëm i Iranit, Abbas Araghchi, deklaroi më herët gjatë ditës se nuk ka bisedime të hapura mes Iranit dhe Shteteve të Bashkuara.
Trump ishte i bindur në efektivitetin e presionit: “Do të funksionojë. Gjithmonë funksionon. Është si një lojë shahu”, tha ai.
