Operacioni për shuarjen e flakëve në zonën e Krujës vazhdon, ndërkohë që Policia e Shtetit dhe shërbimet emergjente mbeten të përkushtuara për administrimin e situatës dhe ruajtjen e sigurisë së popullsisë lokale.
Ministri i Punëve të Brendshme, Besfort Lamallari, së bashku me ministrin e Mbrojtjes, Ermal Nufi, vizituan sot pasdite Krujën për të ndjekur nga afër zhvillimet. Në një deklaratë lidhur me situatën, Lamallari theksoi se zjarri është i qëllimshëm dhe se Policia ka ndërhyrë duke arrestuar të dyshuarin kryesor.
“Policia e Shtetit e ka arrestuar tashmë zjarrvënësin dhe ai do të përballet me pasojat e rënda ligjore për këtë vepër penale”, shkruan ministri Lamallari.
Ministri Lamallari shpjegoi se autori i zjarrit do të mbajë përgjegjësi të plotë për veprën penale të kryer, ndërsa punonjësit e policisë po vijojnë të qëndrojnë në terren për të siguruar mbrojtjen e banorëve.
“Vijojmë të ndjekim nga afër betejën e vështirë me zjarrin në Krujë, që fatkeqësisht edhe kësaj radhe është shkaktuar nga dora e njeriut”, shprehet Lamallari.
Sipas tij, pas një kërkese nga autoritetet vendore, Policia e Shtetit ka ndërmarrë masa për evakuimin e pjesshëm të banorëve pranë zonës së rrezikut, duke synuar të mbrojë jetën e tyre.
“Çdo forcë është në terren dhe çdo mjet është në dispozicion deri në neutralizimin e plotë të rrezikut”, deklaron ministri i Brendshëm.
Operacioni vazhdon të jetë sfidues për shkak të terrenit të vështirë, me pjesëmarrjen e ekipeve në tokë dhe ndërhyrje nga ajri. Shërbimet zjarrfikëse dhe ato të emergjencave janë të angazhuara për të izoluar vatrat e zjarrit dhe për të ndaluar përhapjen drejt zonave të banuara.
