Gjatë një interviste të thellë dhe personale për emisionin “Newsnight” të BBC-së, Hunter Biden hapi zemrën në lidhje me luftën e tij kundër varësisë, faljen presidenciale të dhënë nga i ati dhe shëndetin e ish-presidentit amerikan Joe Biden. Episodi më prekës i bisedës ishte rrëfimi për situatën shëndetësore të Joe Biden, pas diagnozës në maj 2025 me një formë agresive të kancerit të prostatës, i cili në atë kohë kishte metastazuar në kocka.
Hunter Biden tregoi se gjendja e ish-presidentit është rënduar. Ai shpjegoi se sëmundja është përhapur më tej, duke e ekspozuar babanë e tij ndaj dhimbjeve të forta dhe një lodhjeje të thellë. “Është vërtet e vështirë. Është shumë e trishtueshme ta shohësh”, u shpreh Hunter, i cili situatën e përshkroi si jashtëzakonisht të dhimbshme dhe shteruese. Sidoqoftë, ai theksoi se Joe Biden vazhdon të mbetet figura qendrore e familjes së tyre. “Babai im është ende qendra e familjes sonë. Ai është babai më i mirë, burri më i mirë dhe gjyshi më i mirë”, nënvizoi ai. Në intervistë, Hunter Biden iu referua edhe vendimit të Joe Biden, në dhjetor 2024, për ta pajisur me një falje presidenciale të plotë dhe të pakushtëzuar.
Kjo falje përfshinte të gjitha veprat penale federale të kryera në periudhën nga 1 janari 2014 deri në 1 dhjetor 2024. Hunter pranoi se ky hap ishte politikisht i ndjeshëm, por theksoi se e kishte të qartë arsyen që qëndronte pas tij. “Çfarë do të mendonit për babanë tim nëse nuk do ta bënte këtë për mua?”, u shpreh ai. Ai gjithashtu shtoi se Joe Biden kishte pasur frikë se rikthimi i Donald Trump në Shtëpinë e Bardhë mund të shndërronte djalin në një objektiv.
Megjithatë, Hunter mohoi çdo marrëveshje apo komunikim të paracaktuar me babanë e tij për rreth faljes, duke argumentuar se kjo do të ishte jashtëzakonisht e vështirë të mbahej e fshehtë. Ai rikujtoi, gjithashtu, debatin presidencial të qershorit 2024 mes Joe Biden dhe Donald Trump, ku performanca e dobët e Joe Biden shtoi akoma më shumë presion mbi të për shkak të moshës dhe pyetjeve për vijimin e kandidimit të tij. Hunter rrëfeu se duke ndjekur debatin nga Kalifornia, e ndjeu menjëherë se diçka nuk ishte në rregull me të atin. “Isha i shokuar. E dija që diçka nuk shkonte”, tha ai. Fillimisht, ai ia atriboi performancën lodhjes nga udhëtimet dhe angazhimet, por pas zbulimit të diagnozës me kancer të Joe Biden, ka reflektuar nëse sëmundja kishte ndikuar që në atë kohë.
Gjatë bisedës, Hunter Biden foli hapur edhe për periudhën më të vështirë të jetës së tij dhe luftën me varësinë. Ai kujtoi një epokë varësie ekstreme ndaj alkoolit dhe kokainës, duke pohuar se konsumonte sasi masive alkooli dhe përdorte kokainë në mënyrë të përsëritur. Hunter përshkroi atë kohë si “ferr në tokë”, duke mohuar se varësia ishte pasojë e ndjenjës së privilegjit apo fuqisë që vinte nga emri i familjes së tij.
Sipas tij, gjithçka nisi si një përpjekje për të larguar stresin dhe izolimin, por përfundoi në një varësi që i vuri seriozisht në rrezik jetën. Hunter Biden bëri të qartë se nuk ka asnjë plan për t’u angazhuar në politikë apo për të kandiduar për ndonjë funksion publik. Ai synon t’i përkushtohet rritjes së ndërgjegjësimit mbi varësinë dhe procesin e shërimit, një çështje që mund të bëhet një pikë bashkimi në një shoqëri të polarizuar politikisht. Në mbyllje të intervistës, Hunter foli me thellësi emocionale për të atin, duke veçuar më së shumti qëndrueshmërinë e tij në kohë të vështira. “Jam shumë krenar për qëndrueshmërinë e tij”, u shpreh ai, duke e quajtur Joe Biden “personin më të fortë që njeh”.
