Banorët e Divjakës kanë hyrë në ditën e tetë të protestës kundër planit për bashkimin e bashkisë së tyre me atë të Lushnjes, duke theksuar se kërkesa kryesore mbetet ruajtja e statusit të Divjakës si një bashki e pavarur.
Edhe të premten mbrëma, qytetarë të Divjakës dhe përfaqësues nga njësitë administrative fqinje dolën në rrugë për të shprehur kundërshtimin ndaj reformës së re territoriale, e cila synon shkrirjen e bashkisë së Divjakës me Lushnjen.
Gjatë kësaj proteste, qytetarëve iu dha mundësia të flisnin hapur përpara të pranishmëve, duke ndarë shqetësimet dhe duke kërkuar që zëri i tyre të merret në konsideratë para marrjes së çdo vendimi.
Në shenjë pakënaqësie, disa protestues dogjën kartat e anëtarësisë në Partinë Socialiste. Njëkohësisht, organizatorët nisën grumbullimin e firmave për një peticion drejtuar institucioneve shtetërore, në të cilin kërkohet rrëzimi i ndryshimeve të planifikuara territoriale.
Si edhe netët e mëparshme, mbrëmja u mbyll me një marshim të banorëve në rrugët kryesore të Divjakës.
Protestuesit kanë deklaruar se do të vijojnë aktivitetet e tyre deri në marrjen e një vendimi që, sipas tyre, siguron vazhdimësinë e Divjakës si bashki më vete.
