Një aksident i rëndë automobilistik në Greqi ka sjellë pikëllim të thellë në një familje shqiptare dhe ka tronditur komunitetin lokal. Një nënë 43-vjeçare dhe djali i saj 21-vjeçar, të dy me origjinë shqiptare, humbën jetën tragjikisht të premten, më 7 gusht.
Ngjarja ndodhi herët në mëngjes, në një kohë kur të dy po niseshin për në punë. Ata nuk arritën në destinacionin e tyre, pasi u përfshinë në një aksident fatal që rezultoi të ishte udhëtimi i tyre i fundit.
Makina me të cilën udhëtonin u përplas frontalisht me një kamion, duke shkaktuar vdekjen e menjëhershme të të dyve. Autoritetet janë ende duke hetuar rrethanat e saktë të ngjarjes.
Momentet e aksidentit janë regjistruar nga kamera e vendosur në kamion. Kjo video do të përdoret tani nga autoritetet greke për të ndihmuar në sqarimin e plotë të shkaqeve të ngjarjes.
Mediat greke raportojnë se 21-vjeçari ishte në timon, ndërsa nëna ndodhej në sediljen e pasagjerit përpara. Përplasja vlerësohet të ketë qenë aq e ashpër, sa nuk kishte asnjë mundësi për mbijetesë për nënën dhe djalin.
Familja e ardhur nga Shqipëria jetonte në Paleokomi, ku kishin ndërtuar jetën me punë dhe dinjitet. Të dy punonin në të njëjtën kompani të madhe që merret me blerje dhe administrim të pasurive të paluajtshme, me seli në plazhin e Ofrynit (Tuzla), ku edhe ishin duke udhëtuar në momentin tragjik.
Për humbjen ka reaguar i gjithë komuniteti, ndërsa familjarët, babai dhe vajza, mbetën të shkatërruar nga dhimbja. Ata tashmë përballen me një boshllëk të thellë, pas largimit të dy njerëzve më të afërt brenda pak çastesh.
