Ministri i Punëve të Brendshme, Besfort Lamallari, së bashku me Drejtorin e Përgjithshëm të Policisë së Shtetit, Skënder Hita, zhvilluan një inspektim të masave të sigurisë në Himarë, në kuadër të përgatitjeve për sezonin turistik të verës.
Gjatë një takimi me kryetarin e bashkisë, Vangjel Tavo, Lamallari nënvizoi rëndësinë e sigurisë për qytetarët dhe turistët, duke vlerësuar nivelin e lartë të bashkëpunimit midis Policisë së Shtetit dhe autoriteteve vendore.
Ministri informoi se gjatë katër muajve të fundit, shërbimet e policisë kanë ndërhyrë në 67 raste për të asistuar turistët, duke shpëtuar më shumë se 200 vizitorë. Kontrollet në det janë shtuar, me 4 220 mjete lundruese të kontrolluara—një rritje prej 21% krahasuar me vitin e kaluar—ndërkohë që janë ndëshkuar 166 shkelje që kanë rrezikuar sigurinë e pushuesve.
Drejtori i Policisë së Shtetit, Skënder Hita, bëri të ditur se këtë vit, për herë të parë, kontrollet kufitare ndaj jahteve dhe mjeteve lundruese kryhen drejtpërdrejt në det nga Policia Kufitare, gjë që i lehtëson procedurat për turistët.
