Një sasi prej pesë tonësh kokainë është kapur nga autoritetet portugeze në një anije kontejnerësh pranë brigjeve të Portugalisë, në një operacion të përbashkët midis Policisë Gjyqësore, Marinës dhe Forcave Ajrore të këtij vendi. Gjatë ndërhyrjes, tre shtetas të huaj u arrestuan, të cilët dyshohen se janë pjesë e një rrjeti të gjerë ndërkombëtar të trafikut të drogës.
Autoritetet e Portugalisë bënë të ditur se anija kishte nisur udhëtimin nga një shtet i Amerikës Latine dhe u zbulua rreth 640 milje detare larg Lisbonës, në kushte të vështira të motit detar.
Policia raportoi se ky operacion çoi në “çmontimin e një grupi kriminal të dedikuar për kontrabandën e sasive të mëdha të drogës drejt kontinentit evropian”.
Gjatë verifikimit të plotë të anijes, përveç drogës, u zbuluan edhe dëshmi të tjera materiale. Në pranga përfunduan dy udhëtarë si dhe një anëtar i ekuipazhit. Identiteti dhe kombësia e tyre nuk janë bërë të ditura nga autoritetet.
Pas ndërhyrjes, Marina Portugeze e shoqëroi anijen me drogë dhe personat e arrestuar drejt portit të Sines.
Operacioni, i emëruar “Skydrop”, u drejtua nga Njësia Kombëtare Kundër Narkotikëve e Policisë Gjyqësore dhe u mbështet gjithashtu nga Marina dhe Forcat Ajrore Portugeze. Hetimet, të cilat nisën në fillim të këtij muaji, u zhvilluan në bashkëpunim me autoritetet e Britanisë dhe Spanjës.
