Festivali ndërkombëtar “Sunny Hill” ka çelur siparin edhe këtë vit në Prishtinë, duke sjellë nga 31 korriku deri më 2 gusht disa prej emrave më të mëdhenj të muzikës botërore. Nën organizimin e Dua Lipës dhe babait të saj, Dukagjin Lipa, festivali pritet të mirëpresë dhjetëra mijëra pjesëmarrës nga e gjithë bota.
Përtej atmosferës muzikore, vëmendjen e ka tërhequr një detaj simbolik në hyrje të festivalit: flamingot, simboli që u identifikua me protestat qytetare të nisura në Zvërnec kundër projektit të resortit në zonën e mbrojtur dhe që më pas u shndërruan në një lëvizje më të gjerë qytetare në Shqipëri.
Vendosja e këtij simboli në ambientet e “Sunny Hill” shihet si një vazhdim i mbështetjes që Dua Lipa ka shprehur më herët për këtë kauzë. Artistja me famë botërore kishte deklaruar publikisht, gjatë një bisede në podkastin e shkrimtares Lea Ypi, se mbështeste protestuesit dhe mbrojtjen e mjedisit, një qëndrim që u pasqyrua gjerësisht edhe në mediat ndërkombëtare.
Prania e flamingove në festival është interpretuar nga shumë pjesëmarrës si një tjetër mesazh solidariteti me kauzën mjedisore dhe protestat që vijojnë në Shqipëri.
Në skenën e këtij edicioni do të performojnë artistë të njohur botërorë si Katy Perry, Martin Garrix, Lewis Capaldi, Adam Port, Rampa (Keinemusik), Seth Troxler, PAWSA dhe Carlita.
