Çfarë po ndodh me AKU-në e Shkodrës?
Kjo është pyetja që po mundon shumë tregtarë të qytetit, të cilët në këto javë pas shkarkimit të ish-drejtorit Ramir Haderi po përballen me një situatë të paprecedentë.
Për ta bërë të qartë për lexuesit, AKU aktualisht është pa drejtor dhe nga drejtoresha e përgjithshme Blerina Gjylameti, si drejtues të një task force “ad hoc” janë sjellë nga Tirana Gentian Halili dhe Ira Allkoshaj. Të dy këtyre i është bashkuar edhe inspektorja e AKU Shkodër Ingrid Baba. Dhe këtu nis parodia.
Sepse kjo trio drejtuese e përkohshme e AKU Shkodër duket se nuk kanë humbur aspak kohë për formalitete, por janë futur menjëherë në aksion.
Jo për të zbatuar ligjin ndaj bizneseve që mund ta shkelin, por me sa duket për të zbatuar një plan të mirëmenduar për të “sistemuar” xhepat e tyre e me gjasë edhe të drejtueses së tyre në Tiranë.
Aktualisht që flasim, sipas denoncimeve që na kanë ardhur nga bizneset, nga kjo skuadër sulmi janë kërkuar zarfe me shuma që variojnë nga 1 deri në 5 milionë lekë (të vjetra).
Të njëjtat burime na bëjnë të ditur se mes Shkodrës dhe Velipojës janë “gjobitur” nën dorë, një rrjet supermarketesh, një rrjet picerish, 2 pastiçeri, disa dyqane mishi dhe të tjera njësi të vogla me shuma të papërballueshme për buxhetin e tyre.
Ky aksion mafioz nga një institucion shtetëror vjen në momentin kur mendohej se pas heqjes së një drejtori që u akuzua për abuzime, do të vinte dikush me dorë të hekurt në luftën ndaj parregullsisë dhe informalitetit.
Por me sa duket shkodranët thjesht do të duhet të shohin se si ndërrohen hajdutët në krye të institucioneve.
Ndërkohë, një thirrje për të gjitha njësitë tregtare që kanë eksperienca të tilla. Denonconi çdo grabitës që ju vjen në dyqan, sepse vetëm kështu i tregohet vendi kujtdo që kërkon t’ju fusë duart në xhepa.
