Sporti dhe bota akademike shqiptare janë në zi pas ndarjes nga jeta të Prof. Asoc. Dr. Artan Pogonit. Ai u shua në moshën 54-vjeçare në Vlorë, si pasojë e një infarkti.
Artan Pogoni mbante detyrën e Shefit të Departamentit të Edukimit Fizik dhe Sportit në Universitetin “Barleti” dhe ishte anëtar i Senatit Akademik. Me një karrierë të gjatë në fushën e sportit dhe arsimit të lartë, ai dha një kontribut të rëndësishëm si pedagog, studiues dhe drejtues sportiv.
Përveç angazhimit akademik, Pogoni ka shërbyer si drejtor sporti në Bashkinë e Tiranës dhe ka qenë pjesë e drejtimit të klubit Barleti Volej, ku ka kontribuar edhe si trajner.
Autor i disa botimeve shkencore dhe pjesëmarrës në projekte ndërkombëtare, ai njihej edhe për qëndrimet e tij publike mbi zhvillimin dhe problematikat e sportit shqiptar.
Me ndarjen e tij nga jeta, sporti dhe akademia humbasin një nga figurat e spikatura që kontribuoi për edukimin dhe zhvillimin e brezave të rinj.
