Shkodrani Valdrin Pjetri ka ndërmarrë një hap të ri në drejtimin e Agjencisë së Trajtimit të Pronave, duke vendosur komunikimin e drejtpërdrejtë me qytetarët në qendër të punës së institucionit.
Duke nisur nga kjo javë, çdo të mërkurë do të organizohet “Dita e Hapur”, një iniciativë përmes së cilës Pjetri, së bashku me stafin e Agjencisë, do të presë qytetarët për të dëgjuar nga afër shqetësimet dhe problematikat që lidhen me çështjet e pronësisë.
Kjo nismë synon jo vetëm të afrojë institucionin me qytetarët, por edhe të rrisë transparencën dhe efikasitetin në trajtimin e dosjeve të pronës, si dhe në proceset e kompensimit dhe njohjes së pronësisë.
Iniciativa është vlerësuar edhe nga ministri i Drejtësisë, Toni Gogu, i cili theksoi se komunikimi i drejtpërdrejtë me qytetarët është hapi i parë drejt zgjidhjes së çështjeve të pronës. Sipas tij, përshpejtimi i proceseve dhe dëgjimi i çdo qytetari janë pjesë e një qasjeje të re që synon të japë rezultate konkrete.
Me këtë nismë, Valdrin Pjetri synon ta bëjë Agjencinë e Trajtimit të Pronave më të hapur, më pranë qytetarëve dhe më të përgjegjshme në zgjidhjen e problematikave të trashëguara prej vitesh.
