Vllaznia e futbollit të femrave ka kaluar disa ditë në qytetin e Pukës, ku ka nisur fazën e saj përgatitore për ndeshjet e UEFA Women’s Champions League. Në këtë kuadër, kryebashkiaku Rrok Dodaj organizoi një pritje speciale për ekipin kampion të Shqipërisë në zyrën e tij.
Gjatë këtij takimi, Dodaj shprehu mirënjohjen për futbollistet dhe stafin teknik për arritjet e rëndësishme të realizuara gjatë viteve, si në nivelin kombëtar, ashtu edhe në atë ndërkombëtar. Ai theksoi se prania e ekipit në Pukë ka sjellë një atmosferë të këndshme në qytet, duke shtuar se është një tifoz i fervent, jo vetëm për ekipin e meshkujve, por edhe për atë të vajzave.
Kryebashkiaku i uroi ekipit suksese dhe shprehu dëshirën për kualifikimin në turin e tretë të Champions League, ndeshje të cilat do të zhvillohen në fillim të muajit në Qipro.
Si shenjë mirënjohjeje, futbolistët e Vllaznisë i dhanë kryebashkiakut Dodaj fanellën e klubit dhe disa simbole përfaqësuese të skuadrës.
Kjo pritje, megjithatë, bie në kontrast me mungesën e një ceremonie të ngjashme nga Bashkia Shkodër. Edhe pse KFF Vllaznia është skuadra më e suksesshme e futbollit të femrave në Shqipëri dhe përfaqëson Shkodrën në arenën europiane, deri tani nuk është organizuar një pritje zyrtare ose ceremoni vlerësimi nga kryebashkiaku Benet Beci për ekipin kampion. Ky fakt ka shkaktuar diskutime, pasi vajzat kuqeblu janë nderuar nga një bashki tjetër, ndërsa nga institucioni që përfaqësojnë ende nuk kanë marrë ndonjë vlerësim të tillë zyrtar.
