Presidentja meksikane, Claudia Sheinbaum njoftoi të hënën se Meksika do të paraqesë padi penale në SHBA për vdekjen e disa emigrantëve meksikanë në paraburgimin e emigracionit dhe të atyre të vrarë në operacionet e ICE. Vdekjet përfshijnë vrasjen e Lorenzo Salgado Araujo javën e kaluar në Hjuston.
“Është një rast që shkakton zemërim tek të gjithë meksikanët”, tha presidentja meksikane gjatë konferencës së saj për shtyp në mëngjes.
“Nuk mund të vazhdojmë thjesht me letra diplomatike që nuk kanë dhënë asnjë rezultat”, shtoi ajo.
Një total prej 17 qytetarësh meksikanë kanë vdekur që kur presidenti amerikan, Donald Trump filloi goditjen e tij kundër migrantëve: 14 persona në paraburgim dhe tre të tjerë, të cilët, si Salgado Araujo, u vranë gjatë operacioneve të emigracionit.
Salgado Araujo u qëllua për vdekje më 7 korrik, ndërsa po shkonte në punë së bashku me vëllain e tij dhe dy burra të tjerë.
Departamenti i Sigurisë Kombëtare (DHS) ka këmbëngulur se Salgado Araujo është përpjekur të godasë me makinë një oficer të ICE-së, por ky pretendim është kundërshtuar nga tre burrat e tjerë në makinë.
Salgado Araujo kishte jetuar në SHBA për gati 35 vjet dhe nuk kishte ndonjë të kaluar kriminale. Autoritetet në Hjuston kanë nisur hetimin e tyre për incidentin.
Sheinbaum ka bërë thirrje të shpeshta që të respektohen të drejtat e njeriut të qytetarëve meksikanë në SHBA dhe i ka dërguar disa letra diplomatike Uashingtonit duke u ankuar për vdekjet e emigrantëve. Por pas vrasjes së Salgado Araujo, Sheinbaum tha se qeveria e saj do të paraqesë ankesa në gjykatat federale dhe lokale të SHBA-së.
