Vrasja e Aleksandër Koçekut në zonën e Dukagjinit ka rikthyer në vëmendje një përplasje të hershme, e cila lidhet me një ngjarje të rëndë të ndodhur në vitin 2017 në fshatin Grudë të Shkodrës.
Në atë kohë, sipas hetimeve të zhvilluara, vëllai i viktimës së sotme, Artan Koçeku, u dyshua për vrasjen e Angjelin Shkambit, mikut të tij, një ngjarje që prokuroria e lidhi me një konflikt financiar mes tyre.
Shkambi u gjet i pajetë brenda automjetit të tij tip “Mercedes Benz”, pranë një dyqani lulesh në afërsi të varrezave të fshatit Grudë. Sipas hetimeve të kohës, ai ishte qëlluar me armë zjarri dhe dyshimet e prokurorisë u drejtuan ndaj Artan Koçekut.
Sipas akuzës, shkak i konfliktit mes dy personave ishte një borxh prej 30 mijë eurosh. Hetuesit dyshuan se përplasja financiare kishte çuar në përshkallëzimin e marrëdhënieve mes tyre dhe më pas në ngjarjen e rëndë.
Në dosjen hetimore u përmend edhe fakti se Koçeku, në atë periudhë, kishte përfituar një leje të shkurtër nga burgu i Peqinit dhe dyshohej se ngjarja kishte ndodhur pak para rikthimit të tij në institucionin e vuajtjes së dënimit.
Pas viteve të qeta, vrasja e Aleksandër Koçekut ka rikthyer në fokus historinë e konfliktit mes familjeve, duke ngritur dyshime për një hakmarrje të mundshme. Megjithatë, mbetet detyrë e hetimeve të përcaktojnë nëse ngjarja e fundit ka lidhje me episodin e vitit 2017 apo nëse ka një motiv tjetër pas saj.
