Rreth 40 pensionistë nga fshati Xarrë, pjesë e Bashkisë Konispol, shprehin shqetësimin se kanë mbetur pa marrë pensionet që u takojnë për disa muaj, me disa prej tyre që nuk kanë marrë asnjë pagesë për plot 13 muaj.
Ata tregojnë se janë detyruar të mbështeten te ndihma e fëmijëve, pasi të ardhurat e vetme që kishin nuk janë dhënë. Këta të moshuar, shumica e të cilëve kalojnë një pjesë të madhe të vitit në Greqi, Suedi ose vende të tjera, kanë përjetuar frustrim sa herë që janë kthyer në Shqipëri për të tërhequr pensionet e tyre të prapambetura. Nga postieri, ata kanë marrë gjithmonë të njëjtën përgjigje: “Nuk kam ç’tu jap, prisni.”
Pensionistët kanë raportuar se disa prej tyre nuk kanë marrë pensionet që prej 5, 6 ose 8 muajsh, dhe ka raste ku pagesat mungojnë për plot 13 muaj. Dëmi ekonomik për këto familje arrin nga rreth 1 milion deri në mbi 7 milionë lekë të vjetra.
Fatmir Dula, ish-shpërndarësi i pensioneve në këtë zonë, e ka pranuar se një grup banorësh nuk kanë marrë pensionet e tyre. Ai e ka cilësuar këtë si një gabim të rëndë dhe ka deklaruar se u detyrohet rreth 40 pensionistëve, me një vlerë totale prej afro 37 milionë lekësh të vjetra.
Dula ka shpjeguar se pret të përfundojë procedurat e trashëgimisë së një prone, me qëllim që ta shesë dhe të shlyejë detyrimet ndaj pensionistëve. “Brenda rreth 15 ditësh, sapo prona të kalojë në emrin tim dhe të realizohet shitja, do t’u kthej të gjitha paratë,” tha ai, duke pranuar se pensionistët kanë arsye të mendojnë se nuk do t’i besojnë më.
Nga Fiks Fare
