Avokati i Popullit ka zhvilluar një inspektim në Institucionin e Ekzekutimit të Vendimeve Penale (IEVP) Reç, me fokus vlerësimin e kushteve të trajtimit të personave të privuar nga liria dhe respektimin e të drejtave të tyre.
Gjatë vizitës, përfaqësuesit e institucionit u njohën nga afër me kushtet e akomodimit, shërbimet që ofrohen për të dënuarit, si dhe zhvilluan takime me drejtuesit e burgut dhe të burgosurit për të evidentuar problematikat kryesore.
Sipas gjetjeve paraprake, janë konstatuar disa përmirësime në funksionimin e institucionit, megjithatë mbeten ende çështje që kërkojnë ndërhyrje, veçanërisht në drejtim të shërbimit shëndetësor. Avokati i Popullit ka ngritur shqetësimin për nevojën e garantimit të një kujdesi shëndetësor më cilësor dhe në kohë për personat e privuar nga liria.
Në përfundim të inspektimit, institucioni theksoi se do të vijojë monitorimin e kushteve në IEVP Reç dhe do t’u rekomandojë autoriteteve përgjegjëse marrjen e masave konkrete për adresimin e problematikave të evidentuara, me qëllim respektimin e standardeve ligjore dhe të drejtave të të dënuarve.
