Me datë 10 korrik, Kina realizoi me sukses testin e saj të parë të një rakete të ripërdorshme, një hap të rëndësishëm në përpjekjet për të sfiduar dominimin amerikan në sektorin e lëshimeve hapësinore.
Raketa Long March 10B u lëshua nga qendra hapësinore Hainan, në jug të vendit, në orën 12:15 sipas kohës lokale, siç raportoi televizioni shtetëror CCTV.
Pas gjashtë minutash që faza e sipërme, e cila mbante ngarkesën e misionit, u ndanë nga raketa, faza e parë u rikthye në Tokë, duke u ulur vertikalisht në një rrjetë të vendosur mbi një platformë lundruese.
Long March 10B është e njohur si ekuivalenti kinez i raketës Falcon 9 të SpaceX, e cila është e specializuar në dërgimin e ngarkesave me peshë mesatare në orbitë.
Kjo raketë e re është zhvilluar nga Akademia Kineze e Teknologjisë së Mjeteve të Lëshimit (CALVT) dhe ka kapacitetin për të transportuar deri në 16 tonë ngarkesë në orbitën e ulët të Tokës.
Ndryshe nga Falcon 9, e cila ul përmasat e saj në platforma tokësore ose mbi ujë, Long March 10B përdor grepa për t’u kapur në një rrjetë të tendosur.
Përdorimi i raketave të ripërdorshme ul ndjeshëm kostot e misioneve hapësinore, pasi lejon rikuperimin dhe ripërdorimin e fazës së parë, që është pjesa më e shtrenjtë e çdo rakete.
Falcon 9 arriti uljen e saj të parë të suksesshme në vitin 2015, ndjekur nga raketa New Glenn e Blue Origin, e cila i përket Jeff Bezos, që e arriti suksesin e ngjashëm më 2025.
Kina ka investuar rreth një dekadë në zhvillimin e raketave të saj të ripërdorshme.
Disa kompani private kineze gjithashtu janë angazhuar në këtë gara, megjithatë testi i vitit të kaluar i LandSpace nuk arriti të rezultonte i suksesshëm.
Raketa Long March 10B do të luajë një rol të rëndësishëm në misionin e parë për astronautë kinezë drejt Hënës, që pritet të realizohet rreth vitit 2030.
Sipas CCTV, faza e parë e raketës e rikuperuar të premten do të përdoret për një tjetër lëshim testues që do të ndodhë në fund të këtij viti.
